KESAH BAKEI BASARAMIN DENGAN HAMBATAR 

 ( Cerita Kera dengan Hambatar seekor ulat pohon )

oleh KOMUNITAS MANDAU TALAWANG DAYAK BORNEO pada 11 Maret 2012 pukul 16:08 ·

Huran tege kesah …. , te ije kungan Bakei munduk huang hunjun taruk kayu sambil busik ayu-ayun. Andau kiu-kius …. ,ngambutep ngarenang matae basa paham mangat ie hete.

Ie manduan saramin je dino huang petak….. lingak linguk payah arepae nana-nanar huang baun saramin te.

Te ie hamauch kabuatae : “….. Cer kenar irrrr akur tur…. ( cer….. bakena ih aku toh…), Bulur kur bahalar, jambur kur bular balir …….cer.. dia kanarar ampir kur tur…baakeenarrrrrrrrrrrr…”

“….Puuuuuuttt …” auch ketut mahiau bara penda kanih, huang penda parak ruwut .

Sinde tinai haluli bakei te manyaramin arepae, paya-payah……hanjak tutu gite arepae je dia kalaluen ampi , puna bakena.

“….. cer….. kenar irrrr akur tur……bulur kur bahalar…urur kur bahalar..jambur kur bular balir……..cer….cer….”

Tumbah hindai ….uret hambatar bara penda parak ruwut huang penda upon kayu te.

“ ….Puuuuuutt……”auch ketut….

“ Hau…. Ewer arare jer, ngacipur ngacipur akur ter ? …….karer akar kemerrrr ier…. Akur muhur mur kur dinur ,kur muper akar tusur… kur nyiur akar baur…..”

Haluli tinai bakei te nah menyaramin arepae tuntang manara arepae je bakena.

Mangetut hindai uret hambatar bara petak : “ ……puuuuuuuuttt….”

Kuan bakei ,”… karer akar kemer ier ter… akur muhur barar taruk kayur tur… kur gaur… sampar dinor…..

Muhun ndai bakei te … balalu ie mangakas    manantawus uras kare dawen keang , kare uru penda upon kayu te. Nyamah putar biling ie manggau uret je cara mangetut ie nah.

Kajaria…. ..dinon kea uret te….. kuae: “ tuhhhh ..ie ulue hambatar …..je cara mengetut . Akam keme ikau hambatar … “. Duae uret te balalu ajuke huang rumbak urunge .

Uret te balalu miar tame huang rumbak urunge, palus kahuang kuluke. Puna mameh kea je area bakei. Narai ati… te bakei te mangkariak: “…. Hambatarrr….. balua ikau , pehe kuluku…baluaaaa…. baluaaaaa..”

Te bakei nyangit pehe kuluk, ie mahampas kuluke pire-pire kali akan upon kayu je eka busik nah…………

Awi paham kapehe……. Te ie balalu matei .

Palajaran akan itah :

- Ela lalau murah babusau , bajuhu balecak dengan kare kakena kahalap itah kalunen, basa kare kahalap te uras panengan Hatalla bewei, nduem kahalap kakena uras akan manara Hatalla .

- Amunitah belum basewot , tatau,  tege kare kuasa …te ela itah murah basingi , murah barangai auch kare kutak pander dengan uluh beken je balemu tuntang pehe pambelume je jatun ati kare katau uka malawan itah.

- Keleh itah bajenta bajurah, bahalap dengan eweh bewei, ela dia tau pakat, tuntang ela mintih amun itah belum pumpung uluh are, uka jatun oloh je pehe ateia haranan kare taluh gawin itah.

Sansana huran tuh bara Ibu Edy Musa

( Indu Wima )